Уншсан үзсэнээ удахгүй мартаж, би ер нь толгой муутай, нэг чихээр ороод нөгөө чихээр гарчихдаг юм гэх буюу ухаан сохор бол нүд сохор гэх мэт ярьдаг хүн олон. Ойлгож мэдсэн, үзэж сонссон, уншиж бясалгаснаа ой ухаандаа бат тогтоох үндсэн арга зүйн тухай товч өгүүлье. Баттай сайн тогтоох найман төрлийн арга бий. 1. Сэтгэн бодох арга. Хамгийн энгийн, гэхдээ хамгийн чухал нь. Хүмүүс уншсан зүйлээ амархан мартдаг нь уншсанаа сэтгэн бодоогүйгээс болдог. Уншсан зүйлээ хэдий чинээ эргэцүүлэн бодож, сэтгэж чадна учир утгыг нь төдий чинээ амар хялбар ойлгож, ой ухаандаа удаан, бат хадгална.
2. Сонирхлын арга. Мэдлэгийг өөрийн болгож шингээхийн тулд үлэмж дур хүсэлтэй байх хэрэгтэй. Хүсэл сонирхолтой уншсан зүйл ой ухаанд тун амархан шингэх агаад илүү хүч гаргах хэрэггүй, аяндаа сайтар ухагддаг.
3. Өмнөх мэдлэгийн арга. Хэрэв та аль нэг сэдвээр урьд нь ямар нэг мэдлэгтэй байсан бол уг сэдвээр шинээр унших зүйлээ маш амархан, баттайяа тогтооно. Урьд нь уншиж байсан номоо дахиад уншихад яг л шинээр уншиж байгаа юм шиг санагддагийг эрхбиш та ажигласан байх. Энэ нь анх уншиж байх үед олсон мэдлэг, мэдээлэл чинь дутуу дулимаг байгаад дахин уншихад улам бүр батжин баяжсантай холбоотой.
4. Ухааран санахад бэлэн байх арга. Ямар төрлийн мэдээлэл авахаар ухаан бодлоо төвлөрүүлнэ, уг сэдвээс түүнээ буюу түүнд хэрэгтэй бүхнийг шүүн ухаж чадна. Мөн уг мэдээллийг ой тойндоо баттай удаан хадгалж, хэрэгцээт цагтаа хэзээ л бол хэзээ сэргээн санаж чадна.
5. Холбон харьцуулах арга. Нэг зэрэг үүсч бий болсон төсөөллүүд нэг нэгэнтэйгээ холбогдон харилцан уялдаатай ургаж гардаг. Тухайлбал аливаа нэг газар орон тэнд болж өнгөрсөн үйл явдлуудыг ой ухаанд дахин ургуулан бодогдуулдаг.
6. Дэс дарааллын арга. Цагаан толгойн үсгийг дэс дарааллаар нь тогтооход хялбар атлаа эсрэгээр нь цээжлэх гэвэл нэлээн төвөгтэй. Үүний адилаар ямар нэг мэдээлэл, мэдлэгийг ухаж ойлгохдоо дэс дараалал, хэлхээ холбоонд нь авч үзвэл хялбар тогтооно.
7. Хүчтэй сэтгэгдэл төрүүлэх арга. Уншсан зүйл эхлээд ямар сэтгэгдэл төрүүлнэ, тэр чигээрээ ой санамжид үлддэг. Иймд эхний сэтгэгдлийг аль болох хүчтэй, гүнзгий төрүүлэхийг хичээх чухал.
8. Зогсоцын арга. Өмнө нь санаанд үлдсэн зүйлээ сэргээн бататгахын тулд зогсоц хийдэг. Аливаа шинэ мэдээлэл авахын өмнө урьдынхыгаа болж өгвөл сайтар санаж бэхжүүлж байгаарай.
Хориод жилийн тэртээ “Супер” сэтгүүлд нийтлэгдсэн
“Өөрийнхөө ой ухааныг ашиглаж сурагтун”-аас.
No comments:
Post a Comment
Та санал сэтгэгдлээ бичнэ үү.